Kuri uyu wa Gatanu ikipe ya Musanze FC yari yakiriye Al Merrikh SC kuri Stade Ubworoherane y’Akarere ka Musanze umukino w’umunsi wa 20 wa Rwanda Premier League wari urimo ishyaka ryinshi n’amahane warangiye amakipe yombi anganyije igitego 1-1.

Ibyaranze igice cya mbere cy’umukino hagati ya Musanze FC yihariye umukino ndetse ibona korineri eshatu mu gice cya mbere gusa ntacyo byaje kuzibyaza byanatumye amakipe yombi ajya kuruhuka aguye miswi 0-0.

Mu gice cya kabiri, umukino watangiranye ishyaka ryinshi aho Musanze FC nk’ikipe yari mu rugo yari ifite inyota y’igitego ndetse byaje no kuyihira ku munota wa 76 aho Mutsinzi Charles yafunguye amazamu ku mupira mwiza yahawe na rutahizamu Christivie Bioko

Ku munota wa 80 umukino waje guhindura isura habaho gushyamirana hagati ya Bizumungu Omar ukinira Musanze FC na Mujtaba Faisail wa Al Merrikh SC aho umusifuzi wo hagati Ngabonziza Jean Paul yafashe icyemezo cyo kubaha amakarita atukura bombi maze amakipe yombi buri imwe isigarana abakinnyi 10 mu kibuga.

Ikipe ya Musanze FC yaje gukora impinduka ku munota wa 84 aho Munyurangabo Leonidas yasimbuye Mutsinzi Charles mu gihe Murangamirwa Serge yinjiye mu kibuga asimbuye rutahizamu Katembo Lubila Delovin.

Ku munota wa 89 Musanze FC yakoze impinduka aho Muhire Anicet ‘Gasongo’ yasimbuye Kapiteni Ntijyinama Patrick ‘Mbogamizi’.

Ramadan Aga bwa Al Merrikh SC yasimbuye Elmossbah Faisal ku munota wa 85 ndetse bitewe n’igitutu iyi kipe yakomeje kotsa Musanze FC iza kwishyura igitego ku munota wa gatandatu w’inyongera gitsinzwe na Faly Sidiki Coulibaly ku mupira wari utewe uvuye muri Koruneri.

Al Merrikh SC imaze gukina imikino 18 muri Rwanda Premier League y’uyu mwaka, yagumye ku mwanya wa kane n’amanota 34 aho izigamye ibitego umunani mu gihe Musanze FC yo iri ku mwanya wa munani n’amanota 29 n’ibitego birindwi izigamye.