Umunsi wa 23 watangiye Al Hilal SC itsinda Gicumbi FC ibitego 5-0

March 4, 2026

12:42 AM

Ikipe ya Al Hilal SC yatsinze Gicumbi FC ibitego 5-0 ku busa, mu mukino wabereye muri Stade Amahoro.

Wari umukino wabimburiye iyindi y’umunsi wa 23 izakinwa mu mpera z’iki cyumweru, gusa Al Hilal SC ikazaba ikina mu mikino ya CAF Champions League mu mpera z’iki Cyumweru na RS Berkane yo muri Maroc.

Umukino watangiye saa 20:30 z’ijoro, watangiye Al Hilal SC iri hejuru ndetse ubona ko ari ikibazo cy’igihe ikaza kubona igitego.

Ku munota wa 23, Abdelrazig Yagoub yafunguye amazamu ku ruhande rwa Al Hilal SC. Nyuma y’iminota itandatu gusa, Mohamed Yousif yatsinze igitego cya kabiri, ndetse ku munota wa 41 Mamudu Kamaradini atsinda igitego cya 3.

Igice cya mbere cyarangiye Gicumbi FC itarebye mu izamu ndetse amakipe ajya kuruhuka Al Hilal SC iyoboye n’ibitego 3-0.

Mu gice cya kabiri Al Hilal yabonye ibitego 2 byatsinzwe ku munota wa 70 na Ousamane Diouf ndetse na Adama Coulibal watsinze agashinguracumu ku munota wa 75, umukino urangira ari ibitego 5 bya Al Hilal SC ku busa bwa Gicumbi FC.

Rutahizamu wa Al Hilal SC Adama Coulibaly yavuze ko ikipe ye yaje muri uyu mukino igamije gushaka intsinzi izayifasha kwitwara neza muri CAF Champions League.

Yagize ati” Iyi ntsinzi twaje tuyiteguye, nyuma yo gutakaza kuri Mukura VS twaje twiteguye kwisubiza icyubahiro cyacu. Ni umukino uzadufasha kwitegura neza uw’amatsinda ya CAF Champions League tuzahuramo na RS Berkane yo muri Maroc. Tuzahaguruka ejo ku wa Gatatu twerekezayo kandi twizeye ko tyzitwara neza.”

Umutoza wa Gicumbi FC, Bisengimana Justin yavuze ko bakinnye n’ikipe ikomeye ndetse ifite ubunararibonye ugereranyije n’iye.

Yagize ati” Twakinnye n’ikipe nziza ifite abakinnyi bafite ubunararibonye kandi bamaranye igihe ugereranyije n’abacu. Ufite imyaka myinshi mu bakinnyi bacu amaze ibiri mu gice cya mbere. Ntabwo twabaye beza nk’uko twari twabiteguye uhereye mu bwugarizi."

Al Hilal SC yagumye ku mwanya wa mbere n'amanota 45 aho irusha APR FC ya kabiri amanota atatu, Al Merrikh SC iri ku mwanya wa gatatu na 41 mu gihe Gicumbi FC iri ku mwanya wa 12 n'amanota 25.