rwego rutegura Shampiyona y’u Rwanda y’Icyiciro cya Mbere, rwagaragaje ko ruri gutegura uburyo bw’ishoramari mu mupira w’amaguru, aho mu myaka itanu ruzaba rwinjiza miliyari 5 Frw, ikipe yitwaye neza igahabwa miliyoni 300 Frw.

Ibi byagarutsweho n’Umuyobozi ushinzwe ibikorwa muri Rwanda Premier League, Bigirimana Augustin ’Guss’, ubwo yari mu nama nyunguranabitekerezo iri guhuza uru rwego n’abafatanyabikorwa barwo.

Ni inama ibaye nyuma y’uko amakipe Shampiyona y’u Rwanda igeze hagati, aho amakipe hafi ya yose yamaze gukina imikino ibanza, akaba asigaje iyo kwishyura izatangira mu mpera z’uku kwezi kwa Mutarama 2026.

Kimwe mu byakozwe n’uru rwego kuva rwashyirwaho mu 2024, ni ugushaka abafatanyabikorwa no kugabanya amakipe ibyinjizwa na Shampiyona y’Icyiciro cya Mbere, kuko kugeza ubu amakipe yose agabanywa 60% by’ibyinjira.

Amafaranga menshi yinjira muri Rwanda Premier League ni aturuka ku burenganzira bwo kwerekana imikino no kuyitambutsa mu buryo bw’ako kanya. Kuri ubu uru rwego rwinjiza miliyoni 350 Frw.

Rwanda Premier League yatangaje ko mu myaka itanu izakuba gatanu ibyinjira binyuze mu burenganzira bwo kwerekana imikino, ndetse gakuba 20 ibyinjira ku kwerekana imikino mu buryo buzwi nka "streaming".

Muri rusange mu myaka itanu hazajya hinjira miliyari 5 Frw, avemo azajya agabanywa amakipe akina Rwanda Premier League, hanyuma ikipe yegukanye Igikombe cya Shampiyona ihabwe miliyoni 300 Frw.

Muri uyu mwaka w’imikino wa 2025/26, ikipe izatwara Igikombe cya Shampiyona y’u Rwanda izahabwa miliyoni 80 Frw, avuye kuri miliyoni 25 Frw yatangwaga mu myaka yatambutse.

Ikipe ya kabiri izahabwa miliyoni 60 Frw, iya gatatu ihabwe miliyoni 40 Frw, iya kane miliyoni 30 Frw, iya gatanu miliyoni 25 Frw, iya gatandatu miliyoni 20 Frw, iya karindwi miliyoni 15 Frw, mu gihe iya munani izabona miliyoni 10 Frw.

Mu kongerera ubushobozi amakipe n’abakina Shampiyona y’u Rwanda, Rwanda Premier League ikorana n’abafatanyabikorwa bahemba abakinnyi n’abatoza bitwara neza ku mikino.

Umuyobozi ushinzwe ibikorwa muri Rwanda Premier League, Bigirimana Augustin 'Guss', yavuze ko mu myaka itanu iri imbere ikipe izajya yegukana Shampiyona y'u Rwanda izajya ihabwa miliyoni 300 Frw

Amakipe yo muri Rwanda Premier League azayifasha kwinjiza miliyari 5 Frw mu myaka itanu