Ibitego bibiri byo mu gice cya kabiri byafashije Kiyovu Sports gutsinda Mukura Victory Sports et Loisirs 3-1 mu mukino w’Umunsi wa 19, igera ku mwanya wa gatanu ku rutonde rw’agateganyo rwa Rwanda Premier League.
Uyu mukino wahuje aya makipe yombi yashinzwe mu myaka ya 1960, wabereye kuri Kigali Pelé Stadium kuri uyu wa Gatandatu, tariki ya 7 Gashyantare 2026.
Kiyovu Sports yasatiriye mu minota ya mbere, ariko Uwineza René ananirwa kubyaza umusaruro uburyo bwabazwe ku mupira yinjiranye iburyo asize abakinnyi ba Mukura VS ku munota 11, ananirwa kuroba umunyezamu Tuyizere Jean Luc wahise awushyira muri koruneri.
Uwineza yahushje kandi uburyo bw’mupira wahinduwe mu rubuga rw’amahina na Byiringiro David ku munota wa 25, awutera hejuru y’izamu mbere y’uko Nisingizwe Christian wa Mukura VS agerageza ishoti ryafashwe n’umunyezamu James Desire.
Umunya-Mali Moussa Keita ukinira Ikipe ya Kiyovu Sports, yafunguye amazamu ku munota wa 38, ku mupira yatereye mu rubuga rw’amahina nyuma yo guhindurwa na Byiringiro David.
Mbere gato y’uko amakipe yombi ajya kuruhuka, Keita yongeye gutera umupira w’umuterekano ku munota wa 41, ushyirwa muri koruneri n’umunyezamu Tuyizere Jean Luc.
Mu gice cya kabiri, Mutsinzi Patrick yananiwe kwishyurira Mukura VS ku mupira wahinduwe mu rubuga rw’amahina, awukina n’umutwe, ushyirwa muri koruneri n’umunyezamu James Desire wawurengeje izamu.
Byasabye gutegereza umunota wa 74, Mukura VS yishyurirwa na Niyonizeye Fred ku mupira wari uvuye kuri Boateng Mensah.
Ku munota wa 80, Kiyovu Sports yahawe penaliti ku mupira wakozwe na Mbonyamahoro Seriuex mu rubuga rw’amahina, Uwiyaremenye Fidali ayinjiza neza.
Fidali yashoboraga gutsinda igitego cya gatatu ku munota wa 86, acenga umunyezamu Tuyizere Jean Luc nyuma yo gutambuka kuri Tuyishime Emmanuel, ariko agorwa no gutera mu izamu barawumwambura.
Habura umunota umwe ngo umukino urangire, ku munota wa kane w’inyongera, Uwineza René yatsinze igitego cya Kiyovu Sports ku mupira yaherejwe mu rubuga rw’amahina na Mutunzi Darcy, aroba umunyezamu Tuyizere.
Gutsinda uyu mukino byatumye Kiyovu Sports ifata umwanya wa gatanu n’amanota 31 mu gihe Mukura VS yagumanye amanota 30 ku mwanya wa gatandatu.
