Ikipe ya Rayon Sports yatsindiye AS Kigali kuri Kigali Pele Stadium igitego 1-0 mu mukino w'Umunsi wa 18 wa Shampiyona wabaye kuri uyu wa Kane.

Ni umukino watangiye saa Cyenda zuzuye, Rayon Sports itangira umukino ikina neza kurusha AS Kigali, igenda ibona uburyo imbere y'izamu burimo ku ishoti ryatewe na Ndikumana Asman ariko umunyezamu Ndikuriyo Patient umupira awushyira muri koruneri yatewe na Mugisha Didier ntigire icyo itanga.Ku munota wa 36 Rayon Sports yabonye kufura ku ikosa Ndikumana Asman yakorewe na Franklin Onyeabor hanze gato y'urubuga rw'amahina.

Uyu mupira w'umuterekano wari ahantu heza watewe na Emery Bayisenge wari kapiteni uyu munsi maze ukubita igiti cy'izamu uragaruka ariko usanga Mugisha Didier iyi kipe iheruka gutizwa na Police FC ahagaze neza awushyira mu izamu ryari ririnzwe na Ndikuriyo Patient. AS Kigali yakinaga neza ikabona na koroneri kubera abakinnyi bayo nka Sunday Inemesit na Dushimimana Olivier bakinaga baca ku mpande ariko ntihagira n'imwe ivamo igitego, igice cya mbere kirangira Rayon Sports iyoboye n'igitego 1-0.

AS Kigali yatangiye igice cya kabiri isimbuza aho Nshimiyimana Tharcisse yavuyemo agasimburwa na Tuyisenge Arsène. Ku munota wa 48, Tuyisenge Arsene yahaye umupira Sunday Inemesit mu rubuga rw'amahina ariko Kwizera Olivier asohoka neza aratabara. Ku munota wa 60, Aziz Bassane wari umaze iminsi 52 adakina kubera imvune yagiye mu kibuga asimbuye Sindi Jesus. 

AS Kigali yakomeje gushaka uko yakwishyura Rayon Sports ariko ubwugarizi bwari burimo Ramadhan Tshimanga na Bayisenge Emery Bayisenge wari kapiteni ndetse na Uwumukiza Obed wakinaga umukino we wa mbere nyuma yo kuva muri Mukura VS bakomeza guhagarara neza.

Umukino warangiye Rayon Sports ifite igitego 1-0 itsinda umukino wa mbere nyuma y'imikino ine yari imaze idatsinda bituma igira amanota 29 ayishyira ku mwanya wa gatandatu ku rutondo rw'agateganyo mu gihe AS Kigali iri ku mwanya wa 14 n’amanota 16.